Friday, December 14, 2007

പുതിയ ബോസ്

പണ്ട് സ്മിതയായിരുന്നു യു.എസ് ടൈമിംഗില്‍ ജോലി ചെയ്തിരുന്നത്. ഇപ്പൊ ഞാനും. എന്ത് ചെയ്യാനാ? എന്റെ പുതിയ ബോസ് യു.എസ് ടൈമിലാ ജോലി.

നവംബര്‍ 24-നാണ് പുതിയ അദ്ദേഹം ജോയിന്‍ ചെയ്തത്. ആളിത്രേം സ്ട്രിക്റ്റ് ആയിരിക്കും എന്ന് വിചാരിച്ചില്ല. കൃത്യമായി അര മണിക്കൂര്‍ കൂടുമ്പോള്‍ അലാറം വെച്ച പോലെ തുടങ്ങും.. പെപ്പരപ്പേ.. :) എന്താ ചെയ്യാ.. എന്റെ ഹൃദയത്തിന്റെ ഒരു കൊച്ചു തുണ്ടായിപ്പോയില്ലേ.. എവിടെ നിന്നാണോ എനിക്കിത്രയും ക്ഷമയും സ്നേഹവും ഒക്കെ വന്നത്‌.

അമ്മയെന്ന വേര്‍ഷന്റെ പ്രത്യേക ഫീച്ചേര്‍സ് ഇതൊക്കെയാണെന്ന് ഇപ്പഴല്ലേ മനസ്സിലാവുന്നത്‌.

Monday, September 10, 2007

മറ്റൊരു വാര്‍ഷികം

കഴിഞ്ഞ വര്‍ഷം ഇതേ ദിനത്തിലായിരുന്നു പെരുമഴയത്തായിട്ടും സെറ്റ് സാരിയുടുത്ത് സുന്ദരിക്കുട്ടിയായി ഉമേച്ചി ഒരാള്‍ക്കൂട്ടത്തിനു നടുവിലെത്തി പകച്ചു നിന്നതും, ടാക്സി ബില്ല് റീ-ഇമ്പേഴ്സ് ചെയ്യാന്‍ കുമാറേട്ടന്‍ ഓഫീസ് റൂം അന്വേഷിച്ച് നടന്നതും.

വക്കാരിസ്വാന്‍ സാമ്പാര്‍ വെച്ചാഘോഷിച്ചതും, ദേവേട്ടന്‍ കടുമാങ്ങ വിളമ്പാന്‍ ഓടിനടന്നതും വല്യമ്മായി എല്ലാവര്‍ക്കും ബിരിയാണി വിളമ്പിയതും ഇന്നേക്ക് കൃത്യം ഒരു വര്‍ഷം മുന്‍പായിരുന്നു.
ഇത്രേം ആളുകള്‍ കൂടി ഒരുമിച്ചു ചേര്‍ത്തു തന്ന ഈ ജീവിതം ഗുരുവായൂരപ്പന്റെ അനുഗ്രഹത്തോടെ ഇന്ന് സന്തോഷകരമായ ഒരു വര്‍ഷം തികയുകയാണ്.

എല്ലാവര്‍ക്കും സ്നേഹം.

ദിവസങ്ങള്‍ പറന്നാണ് പോയത്.

ഇനി ഇവിടെ എന്ന് വരുമെന്നെനിക്കറിയില്ല. ആരോപണങ്ങളും, പ്രത്യാരോപണങ്ങളും എല്ലാവര്‍ക്കുമെല്ലാവരേയും സംശയവും എല്ലാമായി ഇനിയുമെനിക്കിവിടം എത്രത്തോളം പ്രിയപ്പെട്ടതായിരിക്കും എന്നെനിക്കറിയില്ല. താല്കാലികമായേക്കാം.. മറിയം പറഞ്ഞു പോയ പോലെ ഞാനും.. വിട, നാളെ നേരം വെളുക്കും വരേക്കും വിട.

ഈ മനോഹരമായ ആശംസാ കാര്‍ഡിന് പച്ചാളം കുട്ടിക്ക് ഒരുപാട് നന്ദി..

Wednesday, June 27, 2007

വാര്‍ഷികം - മാറാല നീക്കല്‍

ബ്ലോഗ് തുടങ്ങിയതിന്റെ വാര്‍ഷികത്തിനോ പോസ്റ്റൊന്നും ഇട്ടില്ല. അതൊരു രണ്ട് മൂന്നാഴ്ച മുന്‍പായിരുന്നു. മറന്നു പോയി. അല്ലെങ്കിലും ആരെ ബോധിപ്പിക്കാനാണ്? ഏതായാലും മാറാല നീക്കിയ സ്ഥിതിക്ക്, ഇടയ്ക് എന്തെങ്കിലും ഒക്കെ എഴുതണം.

മലയാളത്തില്‍ എഴുതാന്‍ സഹായിച്ച സിബുവിനോ, പെരിങ്ങോടനോ, പിന്മൊഴികള്‍ (തനിമലയാളവും) നടത്തിക്കൊണ്ട് പോയിരുന്ന ഏവൂരാനോ, അതില്‍ സഹകരിച്ച് പ്രവര്‍ത്തിച്ചിരുന്ന മറ്റുള്ളവര്‍ക്കോ (എന്റെ അറിവ് വെച്ച് അനില്‍ ചേട്ടന്‍, ആദി, ശനിയന്‍, വിശ്വപ്രഭ) അതിനൊക്കെ പിന്നില്‍ സാമ്പത്തികമോ മറ്റെന്തെങ്കിലും തരത്തിലൊ ഉള്ളതായ എന്തെങ്കിലും ലാഭേച്ഛ , ഉണ്ടായിരുന്നതായോ, ഇനിയൊരിക്കല്‍ ഉണ്ടാകുമായിരുന്നു എന്നോ ഞാന്‍ വിശ്വസിക്കുന്നില്ല. ഞാനൊരു മന്ദബുദ്ധിയും, ഇവിടെയൊക്കെ ഉണ്ടെന്ന് പറയപ്പെടുന്ന ഒരു ഗ്രൂപ്പിലും പെടാത്ത ആളും ആയതുകൊണ്ട് വേറൊന്നും അറിയില്ല.

വെറുതെ ഒരു രസത്തിന്, ഇനി മുതല്‍ കമന്റുകള്‍ വേണ്ട. പോസ്റ്റുകളും ആരെങ്കിലും കാണണമെന്ന് ആഗ്രഹമില്ല.

വണ്‍സ് എഗയിന്‍ എന്റെ ബ്ലോഗിന് ബിലേറ്റഡ് ആനിവേര്‍സറി വിഷസ്. :)